Хушчақчақ шахс

Бу тоифага кирувчи одамнинг  хулқ-атворида яққол кўзга ташланиб турадиган хислатлар – ўта бахтиёрлик,  завқланиш, хушчақчақлик, шодланиш, ҳузурланиш ҳиссидир. Бошқаларда шодланиш, завқланиш ҳиссини уйғота олмайдиган вазиятлар унда шундай ҳис-туйғуларни юзага келтира олади. Озгина бўлса-да, қувончли воқеалар дарров уларнинг эътиборини тортади ва кайфиятини қўтаради, худди шундай ғамгин воқеалар эса унинг кайфиятини туширади. У мулоқотга тез киришиб кетиши, сўзамоллиги ва ёқимлилиги билан бошқалардан ажралиб туради, у кулса, яйраб кулади. Шунинг учун ҳам у кўпчиликка ёқади. У баҳслашишни хуш кўради, бироқ баҳсни жанжалгача етказмайди. Турли хил келишмовчиликлар орасига тушиб қолса, вазиятга қараб ё фаол ё пассив иштирокчига айланади. У дўстларига ва яқинларига  жуда боғланиб  яшайди, ачиниш ва раҳмдиллик ҳисси яхши ривожланган бўлади. Ўз ҳис-туйғуларини ҳеч яширмай яққол намоён қила олади. Агар суҳбат чоғида уни яқинроқ билишга бироз ҳаракат қилинса, бемалол бунинг уддасидан чиқиш мумкин, яъни у ўз дардини ёйиб ташлаши мумкин. Аксарият ҳолларда ваҳимачи бўлади, арзимаган вақт ичида кайфияти тез ўзгариб қолиши ва бирдан “портлаб кетиши” мумкин. У беқарор руҳият эгаси  ҳисобланади

Manba: ©Z. Ibodullayev. Tibbiyot psixologiyasi. Darslik., 3-nashr., T.; 2019., 494b.  
           © Ibodullayev ensiklopediyasi., 2022 y;
              ©asab.cc

Дўстларингиз билан бўлишинг