Orqa miya topografiyasi

Markaziy nerv sistemasining umurtqa kanali (canalis vertebralis) ichida joylashgan qismiga orqa miya deb aytiladi. Orqa miya uzunligi 41-45 sm bo‘lib, silindrik shaklga ega. Diametri – 1-1,5 sm. Orqa miyaning ustki chegarasi katta ensa teshigi (foramen occipitale magnum), ya’ni uzunchoq miyaning pastki qismida joylashgan piramidal kesishuv (decussatio pyramidum) sohasiga to‘g‘ri keladi. Bu joy C₁ bo‘yin umurtqasining ustki qismi bo‘lib, undan birinchi bo‘yin segmenti C₁ ildizchasi chiqadi. Orqa miyaning pastki chegarasi konus (conus medullaris) shaklida kichrayib boradi va L₂ umurtqaga etmasdan tugaydi. So‘ngra terminal ip (filum terminale) boshlanadi.
 Orqa miyada ikkita kenglik farqlanadi (4.2-rasm): bo‘yin kengligi (intumescentia cervicalis) va bel kengligi (intumescentia lumbalis). Bo‘yin kengligi C_5-8, Th₁ segmentlardan tashkil topgan bo‘lib, qo‘llarning segmentar innervatsiyasini ta’minlaydi. Bel kengligi Th₁₂, L_1-5, S_1-2 segmentlardan iborat bo‘lib, oyoqlar segmentar innervatsiyasiga ma’sul.
 4.2-rasm. Orqa miyaning uzunasiga tuzilishi sxemasi: 1 – bo‘yin qismi; 2 – intumescentia cervicalis; 3 – ko‘krak qismi; 4 – intumescentia lumbalis; 5 –  conus medullaris.

Manba:  © Z. Ibodullaev. Umumiy nevrologiya. Darslik. Toshkent, 2021.,312b
               © Ibodullaev entsiklopediyasi    
               © asab.cc


Do‘stlaringiz bilan bo‘lishing