Retseptor

Tashqi muhit va organizm to‘qimalaridan ta’sirotlarni qabul qilish va ularga spetsifik javob tayyorlashga sezgi deb aytiladi. Sezgi retseptorlar orqali qabul qilinadi. Ta’sirotlarni qabul qilishga moslashgan sezgi nerv tolalarining terminal qismiga retseptor deyiladi. Retseptor ta’sirotlarni qabul qilish paytida hosil bo‘lgan energiyani nerv impulsiga aylantiradi va bu impuls sezgi nerv tolalari bo‘ylab uzatiladi. 

Tashqi ta’sirotlar tufayli hosil bo‘lgan sezgilarga umumiy sezgi deyiladi. Masalan, og‘riq, harorat va taktil sezgilari bunga misol bo‘la oladi. Ko‘ruv, eshituv, hid bilish va ta’m sezishga spetsifik sezgi deyiladi.  Umumiy va spetsifik sezgilar orqali inson tashqi muhit bilan bog‘lanadi. Obrazli qilib aytganda, sezgi sensor signallar darvozasi hisoblanadi. Sezgi – reflektor faoliyatning boshlang‘ich qismi.