ERTA BOLALIK DAVRINING XAVFSIZ KEChUVChI MIOKLONIK EPILEPSIYaSI

Etiologiyasi. Etiologiyasi noma’lum. Kam uchraydi. Asosan, o‘g‘il bolalar kasallanishadi. Kasallik 1-2 yoshgacha bo‘lgan davrda boshlanadi. Ba’zi bemorlar oilasida epilepsiya bilan kasallanganlar bo‘ladi.
Klinikasi. Asosan, tarqalgan mioklonik xurujlar bilan kechadi. Nevrologik va psixik (psixomotor) buzilishlar kuzatilmaydi.
Tashxis va qiyosiy tashxis. Tashxis qo‘yishda kasallikning boshlangan davri, xurujlar xususiyati va EEG ko‘rsatkichlariga asosiy e’tibor qaratiladi. EEG da bilateral-sinxron tipdagi o‘tkir to‘lqinlar, piklar, o‘tkir va sekin to‘lqinlar kompleksi aniqlanadi. Qiyosiy tashxis uyqu paytida kuzatiladigan fiziologik miokloniyalar bilan o‘tkaziladi. Miokloniyalar turli metabolik buzilishlar (fenilketonuriya), tserebral ishemiya (insult) va infektsiyalarda (entsefalit) kuzatiladi. Ba’zida ushbu kasallikni Uest sindromi bilan farqlashga to‘g‘ri keladi. Epileptik miokloniyalarni EEG va MRT tekshiruvlari yordamida aniqlab olish mumkin.
Davosi va prognozi. Asosan, valproatlar qo‘llaniladi. Odatda, to‘la tuzalish kuzatiladi. Biroq epileptik xurujlar keyinchalik qayta qo‘zg‘alishi mumkin. Prognoz yaxshi.

Manba:  ©Z. Ibodullayev. Asab kasalliklari. 2-nashr. Darslik, Toshkent, 2021., 960 b.
              ©Z. Ibodullayev. Epilepsiya. Qo`llanma., Toshkent, 2018., 128 b.
              © Ibodullayev ensiklopediyasi 
              ©asab.cc



Do‘stlaringiz bilan bo‘lishing