Muskul kuchini tekshirish

Muskul kuchini tekshirish uchun bemordan vrach bajarayotgan passiv harakatlarga qarshilik ko‘rsatish so‘raladi. (3.2-rasm). Mana shu qarshilik darajasiga qarab muskul kuchi aniqlanadi va baholanadi. Muskul kuchi har bir bo‘g‘imda bajarilishi mumkin bo‘lgan harakatlar, ya’ni bukish, yozish, bir-biriga yaqinlashtirish va uzoqlashtirish, pronatsiya va supinatsiya e’tiborga olingan holda tekshiriladi. Qo‘l panjasini bukuvchi muskullar kuchi dinamometr yordamida o‘lchanadi. Barcha tekshiruvlar distal va proksimal hamda o‘ng va chap tomondagi muskullarda qiyoslab o‘rganiladi. Bunda muskullar hajmi va funktsiyasi e’tiborga olinadi. Ortiqcha kuch ishlatilmasligi lozim. 

Muskullar kuchini tekshirish usullari



Tekshirilgan muskullar kuchini baholash 5 balli sistema bo‘yicha o‘tkaziladi (3.1-jadval).
3.1-jadval
Muskullar kuchini baholash jadvali

Baholash mezonlari	Ball	Xulosa
Vrach harakatiga to‘la qarshilik ko‘rsata oladi	5	Norma
Vrach harakatiga qarshilik ko‘rsatish ozgina sustlashgan, ya’ni muskul kuchi biroz pasaygan, biroq faol harakat to‘la saqlangan.	4	Engil falajlik
Vrach harakatiga qarshilik ko‘rsatish sezilarli darajada sustlashgan, ya’ni muskul kuchi pasayganligi yaqqol seziladi. Faol harakatlar hali saqlangan, biroq charchash kuzatiladi.	3	O‘rta darajadagi falajlik
Vrach harakatiga qarshilik ko‘rsatish keskin pasaygan, faol harakatlar o‘ta sustlashgan.	2	Chuqur falajlik
Qarshilik yo‘q, faol harakatlar bilinar-bilinmas.	1	O‘ta chuqur falajlik (deyarli plegiya)
Faol harakatlar umuman yo‘q.	0	Plegiya
Izoh. Tibbiy amaliyotda muskullar kuchini baholashda ushbu usuldan ko‘p foydalaniladi. Biroq, yanada aniqroq ma’lumotni dinamometriya beradi.

Manba:     © Z. Ibodullaev. Umumiy nevrologiya. Darslik. Toshkent, 2021.,312b
                  © Ibodullaev entsiklopediyasi
                  © asab.cc

Do‘stlaringiz bilan bo‘lishing